പാടാം ഞാനെൻ കണ്മണിക്കായ്.......

അലക്ഷ്യമായി ചാനലുകൾ മാറ്റുന്നതിന്റെ ഇടയിലാണ് ഏഷ്യാനെറ്റിലെ ഒരു ടോക് ഷൊ ഇവളുടെ കണ്ണിൽ പെട്ടത്. വിഷയം വാടക ഗർഭപാത്രം.ചർച്ച മുറുകി വരുന്നു,എല്ലാവരും നല്ല ആവേശത്തിലാണ്!

വാടക ഗർഭ പാത്രത്തിനെ അനുകൂലിച്ചു സംസാരിക്കുന്ന ഡോക്ടറെ ഒരു വക്കീലിന്റെ നേതൃത്വത്തിൽ അമ്മ മാർ “പൊരിക്കു“ന്നു. പൈസ വാങ്ങി ഗർഭം ചുമക്കുന്ന മാതാക്കളുടെ ഹൃദയ നൊമ്പരങ്ങളെ പ്പറ്റി വക്കീലിന്റെ ടീം കത്തി കയറുന്നു.

ഇവൾ മനസ്സിലാക്കിയിടത്തോളം വിവാഹിതരായ കുഞ്ഞു കുട്ടി പരാധീനങ്ങളുള്ള സ്ത്രീകൾ അവരുടെ സ്വന്തം ഇഷ്ട പ്രകാരം നല്ല പ്രതിഫലത്തിന് വേണ്ടി ഇതിനു തയ്യാറായി വരുന്നു(അവിവാഹിതർക്ക് ഈ ബിസിനസ്സിൽ റോളില്ല,വിവാഹിതരായ അമ്മമാർക്ക് മുൻ ഗണന!)

ഡോക്ടർക്ക് പറയാൻ ആകെ ഉള്ളത് എല്ലാ പ്രതീക്ഷകളും നഷ്ടപ്പെട്ട ദമ്പതികളു ടെ സങ്കടങ്ങൾ മാത്രം.ഈ കദന കഥകളൊന്നും പക്ഷെ അമ്മമാരുടെ മനസ്സലിയിക്കുന്നില്ല.സഹായത്തിനൊരു പിടി വള്ളി പോലും ഇല്ലാതെ ഡോക്ടർ അക്ഷരാർത്ഥത്തിൽ വെള്ളം കുടിക്കുന്നു!

സംഭവം ആകപ്പാടെ ഇവൾക്കിക്ഷ പിടിച്ചു.കാരണം ഈയിടെ ആയി ഡോക്ടർമാർ മിന്നൽ പണി മുടക്കുനടത്തിയും,കൈക്കൂലി വാങ്ങിയും രോഗികളെ കുറച്ചധികം വെള്ളം കുടിപ്പിക്കുന്നുണ്ട്.അപ്പോൾ ലൈവ് ആയി ഒരു ഡോക്ടർ വെള്ളം കുടിക്കുന്നത് കാണാൻ നല്ല രസം.

സത്യം പറയാമല്ലോ വക്കീൽ ആളൊരു “ഫുലി” തന്നെ.എത്രയോ അനാഥ കുട്ടികൾ ഉണ്ട്, അവർക്കൊരു ജീവിതം കൊടുത്തു കൂടെ,ആ പുണ്യം കിട്ടുമല്ലൊ എന്ന വക്കീലിന്റെ പോയിന്റ് ഉഗ്രൻ.

ഈ കലികാലത്തിലും അനാഥ കുട്ടികലുടെ വേദന മനസ്സിലാക്കാനും അവരെ സ്വീകരിക്കുന്നവർക്ക് ലഭിക്കുന്ന പുണ്യത്തെ പ്പറ്റി ചിന്തിക്കാനും സന്മനസ്സുള്ള അപൂർവം ആളുകളെ ഈ ഭൂമിയിൽ കാണൂ.

വാടക അമ്മമാർ സ്വമനസ്സാലെ എറ്റെടുക്കുന്ന ഗർഭമെന്ന ഡോക്ടറിന്റെ പോയിന്റി നെ വക്കീൽ മലത്തിയടിച്ചു.ഗർഭിണി ആയിരുന്ന കാലത്ത് ഈശ്വര പ്രാർത്ഥനകളിൽ മുഴുകിയതും,നല്ല കുഞ്ഞിനെ സ്വപ്നം കണ്ട് രാപ്പകലുകൾ തള്ളി നീക്കിയതും കുഞ്ഞിന്റെ ആരോഗ്യത്തിന് വേണ്ടി സംഗീതം കേട്ട് മതിമറന്നിരുന്നതും എല്ലാം തന്നെ അമ്മയായ വക്കീൽ വിവരിച്ചപ്പോൾ ഈയുള്ളവൾ കയ്യടിച്ചു


വാടക അമ്മ ഒരിക്കലും ഇതൊന്നും ചെയ്യുകയില്ലല്ലൊ ,കിട്ടാൻ പോകുന്ന കാശു മാത്രം കരുതി സമയം തള്ളി നീക്കും. അമ്മമാരുടെ മാനസിക വ്യാപാരങ്ങളാണല്ലോ കുഞ്ഞിനെ ബാധിക്കുക. അപ്പോഴും വക്കീൽ മറ്റുള്ളവരെ ക്കുറിച്ച് മാത്രമേ ചിന്തിക്കുന്നുള്ളു! എന്തു വിശാല മനസ്കത!
 
വക്കീലിന്റെ അടുത്ത പോയിന്റാണേറ്റവും കിടിലൻ,അമ്മമാരാകാൻ കഴിയാത്ത സ്ത്രീകളുടെ വേദന,അവരുടെ നഷ്ടങ്ങൾ എല്ലാം തന്നെ അമ്മമാരായവർക്ക് മാത്രമേ മനസ്സിലാവുകയുള്ളു!.
 
പാവം ഡോക്ടർക്ക് അതിനുത്തരമില്ല.സംഭവം കസറി.പുലി ആയി വന്ന ഡോക്ടർ എലിയായി മാറി.എന്തായാലും ഇവൾക്കിതെല്ലാം ഒരു പാട് രസിച്ചു.
 
പക്ഷെ പൊതുവെ മണ്ടി ആയ ഇവൾക്ക് ഉത്തരം കിട്ടാത്ത കുറെ സംശയങ്ങൾ ബാക്കിയായി.
 
ആദ്യതെ സംശയം അനാഥ കുട്ടികൾ,അതായത് ഓർഫനേജിൽ വളരുന്ന കുട്ടികളിൽ ഭൂരിഭാഗവും അമ്മമാർ ആഗ്രഹിക്കാതെ,( ചതികളിലും മറ്റും പെട്ട് )ഗർഭം ധരിക്കുന്നതല്ലെ?അങ്ങിനെയുള്ള കുട്ടികൾ അല്ലെ ഉപേക്ഷിക്കപ്പെടുന്നത്? ആ അമ്മമാരൊക്കെ പാട്ടു കേട്ട് വളരെയധികം സന്തോഷതോടെ യാണോ ഗർഭകാലം ചിലവിടുന്നത്?
 
പണം വാങ്ങുന്നു,അല്ലെങ്കിൽ കൊടുക്കുന്നു എന്നതാണ് പ്രശ്നമെങ്കിൽ ഭാര്യമാരെ ജീവിതകാലം മുഴുവൻ “ചുമക്കാൻ” ആയല്ലെ വരന്മാർ സ്ത്രീധനം വാങ്ങുന്നതും വളരെയധികം സന്തോഷത്തോടെ പലരും അതു കൊടുക്കുന്നതും?(കുറ്റകരം ആണെങ്കിലും) അതല്ലേ ആദ്യം എല്ലാ സ്ത്രീകളും ആവേശത്തോടെ ഒത്തൊരുമിച്ച് അവസാനിപ്പിക്കേണ്ടത്?
 
ഒരു സംശയം കൂടി ഈ മണ്ടൻ തലയിൽ ബാക്കി, ഉള്ളവർക്കാണ് ഇല്ലാത്തവരുടെ വേദന മനസ്സിലാകുക എന്നത്, എന്നും വയറു നിറയെ സദ്യ കഴിച്ച് ഉറക്കം തൂങ്ങുന്നവൻ,ഒരു നേരം പോലും ആഹാരം കിട്ടാതെ വിശന്നു പൊരിഞ്ഞലയുന്നവനെ ഓർത്ത്  കണ്ണീർ പൊഴിക്കുന്നത് പോലെ ബാലിശമല്ലെ??
 
എന്തായാലും വക്കീലിനെ പ്പോലെ, “ഉള്ളവർ“ എല്ലാവരും ചിന്തിച്ചാൽ നാട്ടിൽ പട്ടിണി മരണങ്ങളോ കൂട്ട ആത്മഹത്യകളോ പഠിക്കാൻ കാശില്ലാതെ നട്ടം തിരിയുന്ന കുട്ടികളോ ഉണ്ടാവുകയില്ല തീർച്ച തന്നെ! കാരണം ഉള്ളവർക്കല്ലേ ഇല്ലാത്തവരുടെ വേദന അറിയുക?

ഒരു പുതിയ തുടക്കം.

നാടു മുഴുവൻ റിയാലിറ്റി ഷോവിന്റെ പിന്നാലെയാണല്ലൊ.ഈയുള്ളവളും കാണാറുണ്ട് പറ്റുന്ന ഷോ ഒക്കെ.പിന്നെ ഇതെല്ലാം തട്ടിപ്പാണ്,നേരം കളയലാണെന്നു വാദിക്കുന്നവർ കാണണ്ട.ഇതിപ്പോൾ ആരെങ്കിലും നിർബന്ധിച്ചോ? ഹല്ല പിന്നെ!

NDTV  സംപ്രേഷണം ചെയ്തിരുന്ന “രാഹുൽ ദുൽഹനിയാ ലേജായേഗ” ഈയുള്ളവൾ ഒരു എപ്പിസോഡും വിടാതെ കാണാറുണ്ട്.ആഹാ എന്തായിരുന്നു നായകന്റെ ആ ഒരു ഇത്.! ഗോപികമാരുടെ ഇടയിൽ രാസലീല ആടി നടക്കുകയായിരുന്നല്ലോ.ഏതോ ഗോപിക പറയുന്നത് കേട്ടു നായകന്റെ ഇഷ്ട ദേവൻ കൃഷ്ണനാണെന്ന്,(അതു കൊണ്ടാകും നായകന് കൃഷ്ണന്റെ ഒരു മട്ടും ഭാവവും  ഏത്?)

ന്യൂസ് ചാനൽ ഇടാൻ വരുന്ന ഭർത്താവിനെ ഒക്കെ ഇവൾ സാമദണ്ഡ കാലു പിടിക്കലുകൾ കൊണ്ട് അസ്ത്ര പ്രജ്ഞനാക്കും.അൽ‌പ്പ വസ്ത്ര ധാരിണികളായ സുന്ദരിമാരുടെ ഇടയിൽ നായകൻ അങ്ങിനെ വിലസുന്നതു കാണുമ്പോൾ ,ഇവർക്കൊന്നും അച്ഛനും അമ്മയും ബന്ധുക്കളും ഇല്ലേ എന്ന് ഇവൾ അൽഭുതപ്പെടാറുണ്ട്.(വെറും ഒരു സാധാരണ വീട്ടമ്മയാണിവൾ ,ബുജികളെ പ്പോലെ ഇതൊന്നും കാണാതിരിക്കാനുള്ള മനോനിയന്ത്രണമൊന്നും ഇല്ലാത്തവൾ!)

നായകനു വേണ്ടി പാചകം ചെയ്യുന്നതും,നായകനു വേണ്ടി നൃത്തം ചെയ്യുന്നതും,നായകനെ ആകർഷിക്കാൻ വേണ്ടി തങ്ങളെ ക്കൊണ്ട് പറ്റാവുന്ന പോലെ പുതിയ കണ്ട് പിടുത്തങ്ങൾ നടത്തുന്നതും(അബ്ദുൾ കലാമിനു പഠിക്കുന്നത്) അവസാനം തന്നെ ആകർഷിക്കാൻ കഴിയാത്തവളെ  കെട്ടിപ്പിടിച്ച് ഉമ്മ വെച്ച് സമാധാനിപ്പിച്ച്  വീർത്ത കണ്ണുകൾ ഒന്നൂടെ ഉരുട്ടി(മയക്കുമരുന്നടിച്ചതാണെന്ന് അസൂയാലുക്കൾ)നായകൻ യാത്രയാക്കുമ്പോൾ “ഇനിയൊരു ജന്മമുണ്ടെങ്കിൽ ‘പാടി പോകുന്ന ഹതഭാഗ്യയെ കണ്ട് ഇവളും നെടു വീർപ്പിട്ടു.(പാവം ഇനി അടുത്ത ജന്മം  വരെ കാത്തിരിക്കണ്ടെ ആ അസുലഭ ഭാഗ്യം ലഭിക്കാൻ!)

പക്ഷെ എന്തായാലെന്താ ഇപ്പോഴത്തെ മലയാളം കോമഡി പരിപാടികൾകാണുന്നതിനേക്കൾ ഇതിൽ ചിരിക്കാൻ വകയുണ്ടായിരുന്നു എന്നാണിവളുടെ പക്ഷം!അവസാനം ആ കൽക്കത്തയിൽ നിന്നുള്ള  നുണക്കുഴിക്കാരി ഡിംപി ഗാംഗുലി ഗോളടിച്ചപ്പോൾ ഈ യുള്ളവൾ വളരെ അധികം സന്തോഷിച്ചു.മരു മകനെ പ്പറ്റിയുള്ള മിസ്റ്റർ ഗാംഗുലിയുടെ പരാമർശങ്ങൾ കേട്ട് ഇവൾ പറഞ്ഞു ആ ഹാ എത്ര ഉദാത്തം.എന്തു നല്ല അമ്മായിഅച്ചൻ!

NDTV ലൈവ് ആയി കല്യാണം കാണിച്ചു.കല്യാണം കഴിഞ്ഞ് നായകന്റെ വക ഡയലോഗ്  ഭാര്യയുടെ മുഖം കാലത്ത് കണി കണ്ടുണരുന്നത് തന്നെ ഒരു ഭാഗ്യമാണെന്ന്.അതു കേട്ട് ഇവൾ “രോമാഞ്ച കഞ്ചുകി”യായി.

കഴിഞ്ഞ ആഴ്ച തല്ലു കൊണ്ട് വീർത്ത ഭാര്യയുടെ മുഖം പത്രത്തിൽ കണ്ടു.ഓ അല്ലെങ്കിലും നായകൻ പറഞ്ഞോ കാലത്ത് എഴുന്നേൽക്കുമ്പോൾ തല്ലു കൊണ്ട  മുഖം കണി കാണാൻ ഇഷ്ടമല്ല എന്ന്?

എന്തായാലും നായകനെ കിട്ടാത്തതു കൊണ്ട് ജീവിതം നായ നക്കി എന്ന് പറഞ്ഞ് കരഞ്ഞ് യാത്ര പറഞ്ഞ സുന്ദരികൾക്കും,NDTV ക്കും കൂടെ ഈയുള്ളവൾക്കും  അടുത്ത പ്രതീക്ഷക്ക് വകയുണ്ടെന്ന് തോന്നുന്നു!

കുറച്ച് പൂച്ച വിശേഷങ്ങൾ.

പൂച്ചകളെ പറ്റി ആധികാരികമായി പറയാൻ യാതൊരു യോഗ്യതയുമില്ലാത്ത ആളാണ് ഞാൻ,കാരണം ഞാനൊരു മൃഗ സ്നേഹിയേ അല്ല പ്രത്യേകിച്ച് പൂച്ച!(ഇനിയിപ്പോൾ ഇതു കേട്ട് മനേക ഗാന്ധി എന്നെ ജയിലിൽ കേറ്റണ്ട)

പണ്ട് പ്രഹ്ലാദന്റെ കഥയിൽ പറയുന്നതു പോലെ ഹിരണ്യ കശിപുവിന്റെ മകനായി ജനിച്ചു വെങ്കിലും അച്ഛന്റേയും അമ്മയുടേയും ഒരു സ്വഭാവവും ഇല്ലാത്ത മകൻ എന്നുതു പോലെ,പട്ടി പൂച്ച മുതൽ പാറ്റ പല്ലികളെ വരെ സ്നേഹിക്കുന്ന അച്ഛൻ അമ്മ ഭർത്താവ് ചേച്ചി എന്നിവരുടെ ഇടയിൽ “പുകഞ്ഞ കൊള്ളി” പോലെ ഈയുള്ളവളും.

രണ്ട് മക്കളും പ്രവാസികളേയും കെട്ടി നാടു വിട്ടതോടെ അച്ചനും അമ്മയും ഒഴുകിവരുന്ന വാത്സല്യ തീ ശമിപ്പിക്കാൻ വീട്ടിൽ ഒരു കണ്ടൻ പൂച്ചയെ വളർത്തി(കണ്ടൻ ആണെന്നറിഞ്ഞില്ലെന്ന അമ്മയുടെ സാക്ഷ്യ പത്രം!!)

ലണ്ടൻ കാരിയായ ചേച്ചി പതിവു പോലെ വെക്കേഷന് അച്ഛനേയും അമ്മയേയും സ്നേഹിച്ച് കൊല്ലാൻ വീട്ടിലെത്തി. തന്റെ സാമ്രാജ്യത്തിലെത്തിയ പുതിയ പാരയെ എന്തായാലും കണ്ടന് തീരെ ബോധിച്ചില്ല.അച്ഛന്റെ തോളിൽ കയറി കിടന്നുള്ള ഉച്ച മയക്കവും,അമ്മയുടെ തേനൂറുന്ന കൊഞ്ചിക്കലുകളുമെല്ലാം കുറയുന്നതിന്റെ ഈർഷ്യയിൽ ആവാം ചേച്ചിയുടെ ചുരിദാർ വലിച്ചിട്ട്  അതിൽ മൂത്രമൊഴിച്ചിടുക, അവളെ കണ്ണുരുട്ടി പേടിപ്പിക്കുക എന്നതൊക്കെ അവന്റെ സ്ഥിരം കലാപരിപാടികൾ ആയി.എന്തായാലും അവളുടെ പ്രാക്കൊ എന്തോ കൂറച്ച് ദിവസം കഴിഞ്ഞപ്പോഴേക്കും പൂച്ചഎങ്ങിനേയോ ചത്ത് പോയി.

അതു കഴിഞ്ഞ് 5-6 മാസം കഴിഞാണ് ഈയുള്ളവളുടെ അവധിക്കാലം.ഞാൻ മതിമറന്ന് സന്തോഷിച്ചു പൂച്ചയുടെ ശല്യം ഇല്ലല്ലോ എന്ന്.

പക്ഷെ വീട്ടിൽ കാലുകുത്തി നോക്കിയപ്പോൾ അവിടെ കണ്ടനു പകരം മറ്റൊരുത്തി സ്ഥലം പിടിച്ചിരിക്കുന്നു,ഒരു വെള്ള കുറിഞ്ഞിയമ്മ.

അവളും ഒരു കുശുമ്പി തന്നെ..പക്ഷെ പാവം ,പെണ്ണല്ലേ ,നേരിട്ടെതിർക്കാൻ ധൈര്യമില്ലാത്തതു കൊണ്ട് അവൾ മ്യാവൂ പറഞ്ഞ് അമ്മയെ ഉരുമ്മിയിരുന്നു എന്നെ കടകണ്ണുകൾ കൊണ്ട് വീക്ഷിക്കും.അമ്മ ചിന്നൂ എന്ന് നീട്ടി വിളിക്കുമ്പോൾ അവളുടെ മാത്രമാണമ്മ എന്ന മട്ടിൽ  അമ്മയെ മാത്രം ശ്രദ്ധിക്കും(നീ പോടീ പുല്ലേ എന്ന മട്ടിൽ വേറെ ആരും കാണാത്ത വിധത്തിൽ എന്നെ നോക്കും..)

രാത്രി ആയാൽ എല്ലാവരും ഊണ് കഴിക്കാനിരുന്നാൽ  ഊണുമേശയുടെ അടിയിൽ സ്ഥലം പിടിക്കും,അച്ഛനെ സോപ്പിട്ട് കിട്ടുന്ന തരികൾ എല്ലാം അകത്താക്കും.ഞാൻ അവളെ ചീത്ത പറയുന്നതൊന്നും തന്നെ അവൾ ഗൌനിക്കാറില്ല.

 അവസാനം എന്റെ ഊണ് കഴിഞ്  പ്ലേറ്റുമായി അടുക്കളയിൽ പോകുമ്പോൾ അവൾ  എന്റെ റൂമിലെ തയ്യൽ മെഷീനു കീഴെ സ്ഥാനം പിടിക്കും.ഞാൻ  പഠിച്ച പണി പതിനെട്ടും നോക്കും അവളെ ഓടിക്കാൻ ,കാരണം രാവിലെ  4 മണിക്ക് അവൾക്ക് പുറത്ത് പോവണം,അതിനായി നമ്മുടെ കാലിൽ  പതുക്കെമാന്തും ബെഡ് റൂമിന്റെ വാതിൽ തുറക്കാൻ.

എന്തോ പൂച്ച യുടെ ഈ കൊഞ്ചലുകൾ ഒന്നും  തന്നെസഹിക്കാനുള്ള ക്ഷമയൊന്നും എനിക്കില്ല..പക്ഷെ തയ്യൽ മെഷീനടിയിൽ ഇരിക്കുന്ന പൂച്ച ഇനി ക്രെയിൻ കൊണ്ട് വന്നു പൊക്കിയാലും ഇളകില്ല,താമസക്കാർ ഇല്ലാത്തതു കൊണ്ട് മുകളിലെ 2 ബെഡ് റൂമും പണ്ടേ സീൽ വെച്ച് കഴിഞ്ഞിരിക്കുന്നു.!ഇനി ഇപ്പോൾ പൂച്ചയോടുള്ള വാശിക്ക് അവിടെ പോയി തനിയെ കിടക്കാമെന്ന് കരുതിയാൽ ,ഒരു ഉൾഭയം!(പേടിയല്ല,ഞാൻ അങ്ങിനെ പേടിക്കുന്ന കൂട്ടത്തിൽ ഒന്നും അല്ല)

ഈ ബഹളമൊക്കെ കേട്ട് അച്ഛനും അമ്മയും അവളുടെ സഹായത്തിനെത്തും,നമ്മൾ സ്ഥിരമായി കിടക്കുന്ന ഭാഗത്ത് നിന്നു മാറി കിടക്കാൻ പറഞ്ഞാൽ ആർക്കെങ്കിലും ഇഷ്ടപ്പെടുമോ എന്ന ചോദ്യത്തിനു മുന്നിൽ എന്റെ സർവായുധങ്ങളും വെച്ച്കീഴങ്ങി ഞാൻ ബെഡ്ഷീറ്റുമെടുത്ത് സിറ്റിങ് റൂമിൽ കൊതുകു കടിയും കൊണ്ട് കിടക്കും പൂച്ച താഴത്തെ ബെഡ് റൂമിലും!(ഒരു പ്ര വാസിയുടെ കഷ്ടപ്പാടുകൾ!)

കഴിഞ്ഞ വേനൽ അവധിക്കെന്തായാലും എന്റെ അമ്മ അമ്മൂമ്മയായി.കുഞ്ഞി പൂച്ചകളെ പറ്റി ഫോണിലൂടെ പറയുമ്പോൾ മകൾ പ്രസവിച്ച ആഹ്ലാദം അമ്മക്ക്!

നഷ്ട സ്വർഗ്ഗങ്ങൾ!!

ഒരു പ്രവാസി വീട്ടമ്മയായ ഞാൻ പ്രത്യേകിച്ച് പണികൾ ഒന്നും ഇല്ലാതെ ഒരു ദിവസത്തിനെ എങ്ങിനെ പലവിധത്തിൽ കൊന്നെടുക്കാമെന്നാലോചിക്കുന്നതിനിടയിൽ ആണ് ബ്ലോഗെഴുത്താശയം മനസ്സിൽ വന്നത്..പിന്നെ അതല്ലെ ഇപ്പോഴത്തെ ഒരു നാട്ടാചാരവും!നാടോടുമ്പോൾ നടുവെ ഓടുക.

കട്ടിയുള്ള ഗ്ലാസ്സ് ജനാലക്ക് പുറത്ത് ഉരുകിയൊലിക്കുന്ന വെയിൽ.സ്വാഭാവികമായും ആലോചിക്കുക മഴയെ ക്കുറിച്ച് തന്നെ.നാട്ടിലെ വരണ്ട വേനലിലെ ചില വൈകുന്നേരങ്ങളിൽ വിരുന്നു വരാറുള്ള തുള്ളിക്കളിക്കുന്ന മഴ.പിറ്റേ ദിവസം രാവിലെ ഉണർന്നെഴുന്നേൽക്കുമ്പോൾ പുതു മണ്ണിന്റെ ഗന്ധത്തോടൊപ്പം, മണ്ണിൽ ഇതളുകളെല്ലാം കൊഴിഞ്ഞ് കിടക്കാറുള്ള ജമന്തിപ്പൂക്കളുടെ മണം.

പക്ഷെ എനിക്കുറപ്പുണ്ട് ഇവിടെ ഇരിക്കുമ്പോൾ മാത്രമെ ഈ ദുഖമൊക്കെ എനിക്ക് തോന്നുകയുള്ളു.നാട്ടിൽ ആണെങ്കിൽ ഒരു പക്ഷെ ഞാൻ പറഞ്ഞേനെ നാശം പിടിച്ച മഴ, കറന്റ് പോയതു കൊണ്ട് മനുഷ്യന് ഉറങ്ങാൻ പറ്റിയില്ല,എല്ലാ കൊതുകുകളും എന്റെ ശാപാഗ്നിയിൽ വെന്തെരിഞ്ഞേനെ!

അപ്പോൾ ഞാൻ പറഞ്ഞു വന്നത് എന്റെ ബ്ലോഗിന്റെ പേര് “ജമന്തിപ്പൂക്കൾ” എന്നായതിന്റെ പിന്നിലെ രഹസ്യം.ഇനി ബോറടിക്കുമ്പോൾ ഞാൻ അടുത്ത പോസ്റ്റ് എഴുതും.